لاہور(ویب ڈیسک)پاکستان شوبز انڈسٹری کی اداکارہ کلثوم نے اپنے انٹرویومیں بتایا کہ ان کی والدہ نہیں چاہتی تھیں کہ وہ شوبز انڈسٹری میں کام کریں۔
تفصیلات کے مطابق لالی ووڈ کی سینئر اداکارہ پروین اکبر کی بیٹی اور اداکارہ رابعہ کلثوم نے اپنی اداکاری کے باعث مختصر عرصے میں ہی شہرت حاصل کی ہے ۔انہوں نے غیر ملکی خبر رساں ادارے بی بی سی اردو کو انٹرویو دیتے ہوئے ایک سوال کے جواب میں بتایا کہ "ان کی والدہ نہیں چاہتی تھیں کہ وہ انڈسٹری میں کام کریں”۔انہوں نے کہا کہ "والدہ جس وقت سے انڈسٹری میں کام کر رہی ہیں اس وقت اس شعبے میں لڑکیوں کا کام کرنا مایوب سمجھا جاتا تھا، تو ان کے دل میں ڈر تھا کہ انہوں نے جن چیزوں کا سامنا اپنے زمانے میں کیا ہے یا جن حالات سے وہ گزری ہیں، ان چیزوں اور حالات سے میری بیٹی کو بھی گزرنا پڑے گا”۔انہوں نے مزید کہا کہ "ہر کام کرنے والی عورت کے مختلف تجربات ہوتے ہیں، کسی کے مثبت تو کسی کے منفی، اگر اس نظریے کو لے کر بات کریں تو میں اپنی والدہ کے فیصلے سے متفق ہوں” . اداکارہ نے کہا کہ "مجھے ان کا فیصلہ اس وقت بالکل صحیح تھا جس وقت میں نے آنے کی خواہش ظاہر کی تھی، یہ ہی بنیادی وجہ تھی اور میں اس کا بہت احترام کرتی ہوں”۔اداکارہ اعتراضات کے باوجود انڈسٹری میں کیسے آئیں، اس سوال کے جواب میں انہوں نے بتایا کہ "ان کی شادی ہوگئی اور ان کے شوہر بہت ساتھ دینے والے انسان تھے، اس لیے انہیں مشکل نہیں ہوئی”۔واضح رہے کہ رابعہ کلثوم نے جیو ٹی وی کے ڈرامہ ‘زمانی منزل کے مسخرے‘ میں زینب کے کردار سے اداکاری کا آغاز کیا تھا اس کے بعد انہوں نے مختلف ڈرامہ، ویب سیزیز ، فلم اور میوزک ویڈیوز میں کام کیا ہے۔
