لاہور: (سچ نیوز) قومی ٹیم کے ہیڈ کوچ اور چیف سلیکٹر مصباح الحق کا کہنا ہے کہ ایک طویل عرصے کے بعد ٹیم میں شامل کھلاڑی کو تھوڑا وقت لگتا ہے۔
لاہور میں پریس کانفرنس کرتے ہوئے مصباح الحق نے واضح کیا کہ فخر زمان کو ڈراپ نہیں کیا بلکہ آرام کا موقع دیا گیا ہے۔ ٹاپ آرڈر کا پرفارم کرنا بہت ضروری ہے۔ بابر اعظم ٹی ٹونٹی کے بہترین کھلاڑی ہیں۔
ان کا کہنا تھا کہ پہلے میچ میں سری لنکن ٹیم نے اچھی کارکردگی کا مظاہرہ کیا۔ امید کرتا ہوں اگلے میچ میں ٹیم کی بہتر پرفارمنس ہوگی۔ ہماری کوشش ہوگی اگلا میچ جیتیں۔
انہوں نے واضح کیا کہ کسی بھی کھلاڑی کو ایک میچ کی بنیاد پر ٹیم سے نہیں نکالا جا سکتا۔ میڈیا والوں کو لگ رہا ہے کہ پتا نہیں کیسی ٹیم بنائی ہے۔ ایک طویل عرصے کے بعد ٹیم میں شامل کھلاڑی کو تھوڑا وقت لگتا ہے۔ ہم نے ٹیم کے حوالے سے مکمل پلان تیار کیا ہوا ہے۔
مصباح الحق کا کہنا تھا کہ احمد شہزاد کی پی ایس ایل میں اچھی پرفارمنس تھی، اسی وجہ سے انھیں کھیلنے کا موقع دیا گیا۔
انہوں نے تسلیم کیا کہ پاکستانی ٹیم نے پہلے میچ میں اچھی کرکٹ نہیں کھیلی۔ کوشش کریں گے کہ کل کا میچ جیت کر سیریز برابر کریں۔
