”27 فروری کو ہمارے اپنے میزائل نے ہی ہیلی کاپٹر کو نشانہ بنایا “بھارتی ایئر چیف نے اپنی نااہلی کا اعتراف کر لیا

ممبئی (سچ نیوز )27 فروری کو پاک بھارت کشیدگی کے دوران بھارتی فضائیہ کا ایک ہیلی کاپٹر بھی گر کر تباہ ہوا تھا جس کی انکوائری رپورٹ میں ثابت ہو گیا کہ یہ بھارتی فضائیہ کے میزائل سے ہی تباہ ہوا ہے اور اب بھارتی ایئر چیف راکیش کمار نے بھی اپنی نااہلی کا اعتراف کر لیا ہے ۔تفصیلات کے مطابق بھارتی ایئر چیف راکیش کمار نے اپنی نااہلی کا اعترا ف کرتے ہوئے کہا کہ اپنے ہیلی کاپٹر کو مار گرانا بہت بڑی غلطی تھی ، ہمارے اپنے میزائل نے ہی ہیلی کاپٹر کو نشانہ بنایا ، معاملے پر انتظامی اور تادیبی کارروائی کی جارہی ہے ۔ ان کا کہناتھا کہ دو افسران کے خلاف کارروائی کی جارہی ہے ۔ یاد رہے کہ 27 فروری کو بھارت کا ایم آئی 17 ہیلی کاپٹر مقبوضہ کشمیر کے ضلع بڈگام میں گر کر تباہ ہوا تھا ۔یاد رہے کہ 26 فروری کو بھارتی فضائیہ نے پاکستان کی فضائی حدود کی خلاف ورزی کرتے ہوئے بالا کوٹ کے مقام پر پے لوڈ گرایا اور وہاں سے فرار ہوگئے تاہم پاکستان نے اگلے روز بھارت کو بھر پور اندا زمیں جواب دیا اور بھارت کے دو طیارے گراتے ہوئے ایک پائلٹ ابھی نندن کو بھی گرفتار کیاجسے بعد ازاں وزیراعظم عمران خان نے امن کے قیام اور کشیدگی میں کمی کیلئے رہا کرنے کا اعلان کیا ۔