نئی دہلی (سچ نیوز) بھارتی سپریم کورٹ کے سابق جج مرکنڈے کیٹجو نے کہا ہے کہ کشمیر انڈیا کیلئے ویتنام بننے جارہا ہے، جس طرح امریکیوں اور فرانسیسیوں کے ساتھ ویتنام میں ہوا تھا ، امریکیوں کے ساتھ افغانستان میں ہوا ہے یا نپولین کے ساتھ سپین میں ہوا تھا وہی انڈیا کے ساتھ کشمیر میں ہونے جارہا ہے۔بھارتی سپریم کورٹ کے سابق جج مرکنڈے کیٹجو نے عالمی میگزین ’ دی ویک‘ میں لکھے گئے اپنے مضمون میں کہا کہ انڈیا نے مقبوضہ جموں و کشمیر کی خصوصی حیثیت ختم کرنے کے بعد وادی میں بڑی گوریلا جنگ کی بنیاد رکھ دی ہے۔ سچ بولنے کا ایک مقرر وقت ہوتا ہے اور میں سمجھتا ہوں کہ وہ وقت آگیا ہے کہ اب سچ بولا جائے ۔ سچ یہ ہے کہ کشمیر انڈیا کیلئے وہ بننے جارہا ہے جو فرانسیسیوں اور امریکیوں کیلئے ویتنام بن گیا تھا، یا امریکیوں کیلئے افغانستان یا نپولین کیلئے سپین۔انہوں نے کہا کہ آج جو لوگ آرٹیکل 370 کے خاتمے پر اپنی فتح کے شادیانے بجا رہے ہیں ان کیلئے بہت جلد یہ ایک بھیانک سپنا بننے جارہا ہے، یہ اس ڈراﺅنے سپنے کی وجہ سے تب جاگیں گے جب کشمیر سے لاشوں کے بیگ آنا شروع ہوں گے جس طرح ویتنام میں امریکیوں کے ساتھ ہوا تھا۔آج کے دور میں موبائل اور انٹرنیٹ ضرورت ہیں عیاشی نہیں، کسی بھی آدمی کو اس سہولت سے ایک دن کیلئے محروم کرنا بھی تشویشناک ہوسکتا ہے ، اسی لیے ان لوگوں کے جذبات کو سمجھا جاسکتا ہے جن کے پاس گزشتہ 2 مہینے سے یہ سہولت نہیں ہے، اس کے ساتھ کرفیو اور پابندیاں الگ ہیں۔پابندیاں اٹھائیں اور دیکھیں کہ پوری وادی میں کس قسم کا احتجاج ہوتا ہے ، ابھی ایک لاوا پک رہا ہے اور بہت جلد یہ پھٹنے والا ہے، اب صورتحال یہ ہوچکی ہے کہ نا نگلتے بنے ، نا اگلتے بنے ۔
