لاہور: (ویب ڈیسک) پاکستان سپر لیگ (پی ایس ایل) فائیو کے دوسرے مرحلے کے دوران کوئٹہ گلیڈی ایٹرز کی لاہور قلندرز کیخلاف بیٹنگ جاری ہے۔
تفصیلات کے مطابق پاکستان سپر لیگ فائیو کے دوسرے مرحلے کے دوران 16 ویں میچ میں کوئٹہ گلیڈی ایٹرز کے کپتان سرفراز احمد نے ٹاس جیت کر پہلے باؤلنگ کا فیصلہ کیا اور لاہور قلندرز کو ہوم گراؤنڈ پر بیٹنگ کی دعوت دی۔
لاہور کے قذافی سٹیڈیم میں کھیلے جانے والے میچ میں لاہور قلندرز کی طرف سے اننگز کا آغاز فخر زمان اور کرس لائن نے کیا۔
لاہور قلندرز کی ٹیم نے شروع سے ہی جارحانہ انداز اپنایا اور وکٹ کے چاروں اطراف فخر زمان اور کرس لائن نے شارٹس کھیلے، تاہم 36 کے مجموعی سکور پر فخر محمدنواز کی گیند پر انور علی کو کیچ دے بیٹھے۔
کرس لائن 22 گیندوں پر 27 رنز بنا کر محمد حسنین کا شکاربن گئے، محمد حفیظ پہلی ہی گیند پر فواد احمد کی گیند پر پویلین لوٹ گئے، شین واٹسن نے شاندار کیچ تھاما۔
بین ڈنک اور سمت پٹیل نے جارحانہ انداز اپناتے ہوئے کوئٹہ گلیڈی ایٹرز کے باؤلرز کو بے بس کر دیا، 15 اوورز کے دوران ڈنک نے محمد نواز کو ایک اوور میں چار چھکے لگائے۔
انگلینڈ سے تعلق رکھنے والے سمت پٹیل نے ساتھ نبھاتے ہوئے 40 گیندوں پر 71 رنز کی اننگز کھیلی۔ کٹنگ کی گیند پر محمد نواز نے کیچ تھاما۔
آسٹریلیا سے تعلق رکھنے والے بین ڈنک نے 43 گیندوں پر 93 رنز کی طوفانی باری کھیلی۔ کٹنگ کی گیند پر احسن علی نے کیچ تھاما۔ ان کی اس اننگز کی ایک خاص بات یہ بھی تھی کہ انہوں نے ایک میچ میں سب سے زیادہ چھکے مارنے کا ریکارڈ بھی حاصل کر لیا، انہوں نے دس چھکے لگائے۔ اس سے قبل عمر اکمل اور شرجیل خان نے ایک میچ کے دوران 8.8 چھکے مارے ہوئے ہیں۔
لاہور قلندرز نے مقررہ اوورز میں 209 رنز بنائے۔ پاکستان سپر لیگ کا تیسرا بڑا ٹوٹل ہے۔ آج میچ کے دوران کوئٹہ گلیڈی ایٹرز کی طرف سے فواد احمد، محمد نواز، محمد حسنین نے ایک ایک وکٹ حاصل کی۔
ہدف کے تعاقب میں کوئٹہ گلیڈی ایٹرز کی طرف سے اننگز کا آغاز انگلینڈ سے تعلق رکھنے والے جیسن روئے اور سابق آسٹریلوی آل راؤنڈر شین واٹسن نے کیا۔
میچ میں دوسرے اوورز کے دوران قذافی سٹیڈیم کی اچانک لائٹس بند ہو گئی جس کی وجہ سے میچ کو تھوڑی دیر کے لیے روکنا پڑا۔ کوئٹہ گلیڈی ایٹرز کے پلیئرز دوبارہ پویلین لوٹ گئے۔
اس وقت کوئٹہ گلیڈی ایٹرز نے لاہور قلندرز کے خلاف 2 اوورز میں 15 رنز بنا لیے ہیں۔ جیسن روئے 6اور واٹسن 6 رن کیساتھ کریز پر موجود ہیں۔
ٹاس جیتنے کے بعد کوئٹہ گلیڈی ایٹرز کے کپتان سرفراز احمد کا کہنا تھا کہ ٹیم میں ایک تبدیلی کی گئی ہے۔ سہیل خان کی جگہ فواد احمد کو ٹیم میں شامل کیا گیا ہے۔
دوسری طرف لاہور قلندرز کے کپتان سہیل اختر کا کہنا تھا کہ ٹیم میں تین تبدیلیاں کی گئی ہیں۔ بین ڈنک، محمد فیضان، پرسانا کو ٹیم میں شامل کیا جائے۔
