ٹرمپ انتظامیہ کی شام سے مکمل فوجی انخلا کی تیاری، پینٹاگون کی مخالفت

واشنگٹن (سچ نیوز) امریکہ شام سے اپنی افواج نکالنے کی تیاری کر رہا ہے کیونکہ امریکی فوج شام کو داعش سے پاک کرکے بیشتر علاقہ واپس حاصل کرنے کے قریب پہنچ چکی ہے۔ دوسری جانب پینٹاگون کی جانب سے امریکہ کے اس اقدام کی مخالفت کی جارہی ہے۔برطانوی خبر رساں ادارے روئٹرز کے مطابق امریکی حکام نے نام ظاہر نہ کرنے کی شرط پر بتایا کہ امریکہ نے شام سے مکمل فوجی انخلا کی تیاریاں شروع کردی ہیں۔ امریکی صدر ڈونلڈ ٹرمپ اپنے فوجیوں کو گھر واپس لانے کی بات پہلے ہی کرچکے ہیں۔ شام سے امریکی فوجیوں کے انخلا کے حوالے سے پینٹاگون اور وائٹ ہاﺅس نے کوئی موقف نہیں دیا۔اس وقت شام میں امریکہ کے 2 ہزار فوجی موجود ہیں جوکرد اور عرب جنگجوﺅں کے اتحاد سیرین ڈیموکریٹک فورسز (ایس ڈی ایف) کے ساتھ مل کر خصوصی آپریشنز سرانجام دے رہی ہیں۔ امریکہ کی جانب سے یہ بات ایک ایسے وقت میں سامنے آئی ہے جب ترکی نے حال ہی میں ایس ڈی ایف کے خلاف کارروائی کرنے کی دھمکی دی ہے۔دوسری جانب نجی ٹی وی نے دعویٰ کیا ہے کہ شام سے امریکی فوج کے انخلا کا اعلان آج متوقع ہے تاہم امریکہ کے محکمہ دفاع پینٹاگون کی جانب سے اس کی مخالفت کی جارہی ہے۔ پینٹاگون نے قرار دیا ہے کہ افواج کے انخلاف کا امریکی اقدام خود اتحادیوں کو دھوکہ دینے کے مترادف ہوگا۔