شام میں فوج کو ایران کے خلاف متحرک کر رہے ہیں: نیتن یاھو

یروشلم(سچ نیوز)اسرائیلی وزیراعظم بنجمن نیتن یاھو نے ایک بار پھر شام میں ایرانی فورسز کے خلاف بھرپور کارروائی کی دھمکی دی ہے۔ ان کا کہنا ہے کہ ان دنوں وہ ایک بار پھر شام میں اپنی فوج کو ایران کے خلاف متحرک کر رہے ہیں۔عرب خبررساں ادارے کے مطابق نیتن یاھو نے ایک بیان میں کہا کہ شام میں ایران کا وجود ہمارے لیے ایک حقیقی خطرہ ہے۔کنیسٹی کے اجلاس سے خطاب میں نیتن یاھو کا کہنا تھا کہ ہمارا ہدف شام میں ایران کو نکیل ڈالنا ہے جو اسرائیل کو صفحہ ہستی سے مٹانے کی کوشش کررہا ہے۔ان کا کہنا تھا کہ ہماری حکومت ایرانی خطے سے نمٹنے کے لیے صرف زبانی دعوے نہیں کر رہی بلکہ ہم عملی اقدامات کر رہے ہیں۔ شام میں ہم اپنی فوج کو ایک بار پھر ایران کے خلاف متحرک کر رہے ہیں۔نیتن یاھو نے توقع ظاہر کی ایران پر اقتصادی دباؤ بڑھانے کے لیے امریکا اسرائیل کی بھرپور مدد کرے گا۔