اسلام آباد (سچ نیوز )وزیراعظم عمران خان نے ڈیم بنانے کے لیے بیرون ملک پاکستانیوں سے کردار ادا کرنے کی اپیل کی توبہت سے بیرون ملک مقیم پاکستانیوں نے سوشل میڈ یا پر چندہ ادا کرنے کا اعلان کردیا لیکن ایسے میں ہی پاکستانی نژاد امریکی شہری شاہد خان کے حوالے سے ڈیم فنڈ میں ایک ارب ڈالر عطیہ کرنے کی افواہیں بھی اڑنے لگی تاہم بعد میں یہ افواہ جھوٹی ثابت ہوئی ۔اب شاہد خان خود بھی میدان میں آگئے اور انہوں نے اس خبر کی تردید کی ۔
مائیکرو بلاگنگ ویب سائٹ ٹوئٹر پر ”ڈیلی پاکستان گلوبل“کی ڈیم فنڈ سے متعلق افواہ کی خبر کا حوالہ دیتے ہوئے کہا کہ یہ سب افواہیں ہیں ،میں نے ڈیم فنڈ کے لیے ایک ہزار ڈالر دئیے ہیں ۔اس سے قبل میڈیا پر ایک بیان نشر ہوا جسے فیصل جاوید سے منسوب کیا گیا کہ ”فیصل جاوید وزیراعظم کو بتایاہے کہ امریکہ سے پاکستانی ایک ارب ڈالرفنڈدینا چاہتاہے “،تاہم سینیٹر فیصل جاوید نے اس پر رد عمل جاری کرتے ہوئے کہا کہ ” میں نے اس قسم کا کوئی بھی بیان نہیں دیا ہے۔“
