زائرہ وسیم کے فلم انڈسٹری چھوڑنے پر پاکستانی اداکارہ یمنیٰ زیدی کا حیران کن رد عمل آگیا

کراچی (سچ نیوز) بالی ووڈ کی کشمیری اداکارہ زائرہ وسیم نے بالی ووڈ چھوڑنے کا اعلان کیا تو انہیں انڈیا میں بھرپور تنقید کا سامنا کرنا پڑا۔ بہت سے اداکاروں نے مذہب کو بنیاد بنا کر انڈسٹری سے کنارہ کشی اختیار کرنے کے فیصلے کو غلط قرار دیا لیکن ایسے میں پاکستانی اداکارہ یمنیٰ زیدی نے بالی ووڈ اداکارہ زائرہ وسیم کو ان کے فیصلے پر سراہا ہے۔ زائرہ وسیم کی جانب سے انسٹاگرام پر کی گئی پوسٹ پر اپنے جواب میں ٹی وی اداکارہ یمنیٰ زیدی نے لکھا ’ ماشاءاللہ ، آپ نے کیا ہی خوبصورت فیصلہ کیا ہے، اللہ کرے کہ آپ کو اپنی زندگی میں سکون، خوشیاں اور اطمینانِ قلب حاصل ہو، آپ ایک مضبوط روح کی مالک ہیں۔‘ خیال رہے کہ دنگل فلم سے شہرت کی بلندیوں پر پہنچنے والی 18 سالہ زائرہ وسیم نے اتوار کو بالی ووڈ سے کنارہ کشی کا اعلان کیا تھا ، انہوں نے کہا تھا کہ فلم انڈسٹری کے باعث ان کا ایمان خطرے میں ہے اور ان کا اپنے اللہ سے رشتہ کمزور ہوگیا ہے جس کے باعث وہ آئندہ اس شعبے میں کام نہیں کریں گی۔ اداکارہ نے سوشل میڈیا اکاﺅنٹس سے اپنی تمام تصاویر بھی ہٹادیں جبکہ اپنی آخری فلم ’ سکائی از پنک‘ سے بھی علیحدگی اختیار کرلی ہے۔