یہ سمجھنا چین عالمی تسلط قائم کرنے جا رہا ہے سنگین غلطی ہے: چینی وزیرخارجہ

بیجنگ (سچ نیوز )چین کے وزیر خارجہ وانگ ای نے کہا ہے کہ کچھ امریکی سمجھتے ہیں کہ چین عالمی تسلط قائم کرنے جا رہا ہے، وہ امریکا کی جگہ لے گا یا اسے چیلنج کرے گا، یہ سنگین غلطی ہے جو امریکی مفادات کو شدید نقصان پہنچائے گی۔غیرملکی خبررساں ادارے کے مطابق چینی وزیرخارجہ نے نیویارک میں اقوام متحدہ کی جنرل اسمبلی اجلاس کی سائیڈ لائنز پر کونسل آن فارن ریلیشنز میں خطاب کیا۔ان کا کہنا تھا کہ پچھلے چند100 برسوں کے دوران مغرب میں ہوتا یہ رہا ہے کہ جو ملک مضبوط ہو جاتا ہے وہ دوسرے ملکوں پر تسلط جمانے کی کوشش کرتا ہے، اب امریکی دوست یہ سمجھتے ہیں کہ چین بھی ایسا ہی کرے گا، وہ امریکی طاقت کو ہٹا دے گا یا اسے چیلنج ضرور کرے گا۔انہوں نے کہا کہ واضح کرنا چاہتا ہوں کہ یہ نظریہ ایک سنگین سٹریٹیجک غلطی ہے، یہ گمراہ کن اندازہ امریکی مفادات اور امریکا کے مستقبل کے لیے انتہائی نقصان دہ ہوگا۔چینی وزیرخارجہ نے کہا کہ افسوس ہے کہ یہ خودساختہ اندیشہ پھیل رہا ہے اور اسے طول بھی دیا گیا ہے، اس سے نئے شکوک و شبہات جنم لے سکتے ہیں اور اہم مسائل کے حل میں مزید مشکلات پیدا ہو سکتی ہیں۔