بندر سری بیگوان(سچ نیوز) برونائی کے سلطان نے گزشتہ دنوں ہم جنس پرستوں کو سنگسارکرکے موت کے گھاٹ اتارنے کی سزا دینے کا فیصلہ کیا تھا، جس کی وجہ سے وہ بڑی مشکل میں پھنس گئے ہیں۔ میل آن لائن کے مطابق برونائی کے سلطان نے ملک میں شرعی قوانین نافذ کرنے کا اعلان کیا تھا جس کے تحت ہم جنس پرستی سمیت دیگر کئی جرائم پر اسلامی سزائیں دی جانی ہیں۔ ابھی یہ قانون لاگو بھی نہیں ہوا کہ بین الاقوامی سطح پر سلطان کو شدید تنقید کا سامنا کرنا پڑ گیا ہے اور جارج کلونی، ایلٹن جان اور ایلن ڈی جینرس سمیت کئی ہالی ووڈ اداکار اور دیگر بڑی شخصیات سلطان کے ملکیتی ہوٹلوں کا بائیکاٹ کرنے کا مطالبہ کر چکے ہیں۔رپورٹ کے مطابق برونائی کے سلطان کا شمار دنیا کے امیر ترین افراد میں ہوتا ہے جو ایک ہوٹل چین کے مالک ہیں جس کے ہوٹل دنیا بھر میں موجود ہیں۔ان کی اس ہوٹل چین نے اپنے سوشل میڈیا اکاﺅنٹس پر ایک بیان جاری کیا جس میں انہوں نے لکھا کہ ”ہم تنوع(Diversity)کی حمایت کرتے ہیں اور صنفی و جنسی امتیاز کو قطعاً برداشت نہیں کرتے۔“ اس پر دنیا بھر کے لوگ ہوٹل چین کو اس قدر تنقید کا نشانہ بنا رہے تھے کہ اسے اپنے سوشل میڈیا اکاﺅنٹس ہی بند کرنے پڑ گئے۔ سوشل میڈیا صارفین کا کہنا تھا کہ ”ہوٹل چین کا یہ بیان محض دکھاوا ہے کیونکہ خود سلطان آف برونائی ملک میں ہم جنس پرستوں کو سزائے موت دینے کا قانون لانے جا رہے ہیں۔“معروف صحافی پیٹر مک گوئر نے ہوٹل چین کے ایک سوشل میڈیا اکاﺅنٹ کو ٹیگ کرتے ہوئے لکھا کہ ”تم کیسے کہہ سکتے ہو کہ تم نسلی و صنفی امتیاز کو برداشت نہیں کرتے، جب تمہارا مالک ہم جنس پرستوں کو سنگسار کرنے جا رہا ہے؟“
