نئی دلی (سچ نیوز) بھارت میں ہونے والے لوک سبھا انتخابات کے دوران فلمی صنعت سے تعلق رکھنے والے کئی ستاروں نے بھی بی جے پی کے پلیٹ فارم سے کامیابی حاصل کی ہے ۔ ان میں سے کچھ لوگ تو مودی کی کابینہ میں جگہ بنانے میں کامیاب ہوگئے ہیں جبکہ متعدد لوگ وزارتوں سے محروم رہے ہیں۔
بھارت کے لوک سبھا انتخابات میں حکمران جماعت بی جے پی نے تاریخ ساز کامیابی حاصل کی ہے۔ وزیر اعظم نریندر مودی نے جمعرات کے روز اپنی کابینہ سمیت حلف اٹھایا ہے۔ ان کی کابینہ میں کانگریس کے صدر راہول گاندھی کو شکست دینے والی اداکارہ سمرتی ایرانی بھی شامل ہیں ، وہ مودی کی گزشتہ حکومت میں بھی کابینہ کی اہم ترین رکن تھیں۔
مودی کی کابینہ میں کئی مشہور شخصیات جگہ بنانے میں ناکام رہی ہیں جن میں بھارت کے سابق کرکٹر گوتم گمبھیر بھی شامل ہیں، انہوں نے مشرقی دلی سے کامیابی حاصل کی تھی۔ بالی ووڈ کی ڈریم گرل ہیما مالنی نے متھرا سے مسلسل دوسری بار کامیابی حاصل کی ہے لیکن وہ اس بار بھی کابینہ میں جگہ بنانے میں کامیاب نہیں ہوسکیں، ان کے سوتیلے بیٹے سنی دیول نے گورداس پور سے کامیابی حاصل کی لیکن وہ بھی مودی کے قریبی ساتھیوں میں شامل نہیں ہوسکے۔
بالی ووڈ اداکارہ کرن کھیر دوسری بار لوک سبھا کی رکن منتخب ہوئی ہیں لیکن انہیں اس بار بھی کابینہ میں جگہ نہیں ملی۔ پنجابی گلوکار ہنس راج ہنس نے شمال مغربی دلی سے کامیابی حاصل کی مگرانہیں بھی کسی وزارت کا قلمدان نہیں سونپا گیا۔بھوجپوری فلموں کے سپر سٹار روی کشن نے گورکھپور کے حلقے سے ریکارڈ توڑ کامیابی حاصل کی لیکن انہیں بھی کابینہ میں شا مل نہیں کیا گیا۔ بھوجپوری فلموں کے اداکار منوج تیواری نے دلی سے کانگریس کی شیلا دکشت کو شکست دی لیکن وہ بھی کابینہ کا حصہ نہیں بن سکے۔
