پابندیاں ختم نہ ہوئیں تو جوہری ہتھیار سازی شروع کر سکتے ہیں: شمالی کوریا

پیانگ یانگ(سچ نیوز)شمالی کوریا نے کہا ہے کہ اگر امریکا اپنی اقتصادی پابندیوں کو ختم نہیں کرتا تو جوہری ہتھیار سازی کے پروگرام کا دوبارہ آغاز کیا جا سکتا ہے۔ غیرملکی خبررساں ادار ے کے مطابق شمالی کوریائی وزارت خارجہ کا یہ بیان ایک ایسے وقت میں سامنے آیا ، جب امریکی اور جنوبی کوریائی حکومتوں نے شمالی کوریا پر پابندیوں کے ذریعے دباؤ برقرار رکھنے پر اتفاق کیا ہے۔ شمالی کوریائی وزارت خارجہ نے اپنے بیان میں واضح کیا کہ امریکا اپنے موقف میں تبدیلی پیدا نہیں کرتا تو شمالی کوریا اپنی اقتصادی ترقی کے لیے جوہری قوت میں اضافہ کر سکتا ہے۔ دوسری جانب امریکی وزیر خارجہ مائیک پومپیو نے شمالی کوریائی سفارت کار سے اگلے ہفتے کے دوران ملاقات کا عندیہ دیا ہے۔