میانمار میں تشدد کی روک تھام کے لیے فیس بک کا کردار ناکافی

ینگون(سچ نیوز)سماجی رابطوں کی ویب سائٹ فیس بک نے تسلیم کیا ہے کہ انسانی حقوق کی ایک تازہ رپورٹ کے نتائج سے یہ ثابت ہوتا ہے کہ اس ویب سائٹ نے میانمار میں آن لائن تشدد پر اکسائے جانے کے عمل کے انسداد کے لیے مناسب کارروائی نہیں کی۔ میڈیا رپورٹس کے مطابق سفارش کی گئی ہے کہ تشدد کی حوصلہ شکنی کے لیے انتظامیہ اپنی پالیسیوں پر عملدرآمد کے لیے زیادہ فعال کردار ادا کرے۔ کمپنی کے ایک اعلی اہلکار ایلکس واروفکا نے کہا ہے کہ وہ یہ تسلیم کرتے ہیں کہ انتظامیہ کو مزید کچھ کرنا چاہیے۔ میانمار میں روہنگیا مہاجرین کے خلاف مظالم میں ملکی فوج کو ملوث قرار دیا جاتا ہے۔ فیس بک نے رواں برس اگست میں چند فوجی اہلکاروں کے فیس بک اکاونٹ بند کر دیے تھے۔