مشہور بالی ووڈ کوریوگرافر سلمان یوسف پر خاتون کو ایک سے زائد بار جنسی ہراساں کرنے پر مقدمہ درج

ممبئی(سچ نیوز) نامور بالی ووڈ کوریوگرافر اورمقبول ڈانس شو ’’ڈانس انڈیا ڈانس‘‘ سیزن ون کے ونر سلمان یوسف خان پر خاتون نے ایک سے زائد بار جنسی ہراسانی کاالزام لگایاہے،پولیس نے مقدمہ درج کر لیا ۔بھارتی میڈیا کے مطابق کوریوگرافر اور ڈانسر سلمان یوسف خان کے خلاف ایک خاتون ڈانسر نے ممبئی کے اوشیوارا پولیس سٹیشن میں شکایت درج کرائی ہے جس میں موقف اختیار کیاگیا ہے کہ سلمان یوسف اور ان کے کزن نے انہیں ایک سے زائد بار جنسی طور پر ہراساں کیا اوربدسلوکی کی۔خاتون ڈانسر(شناخت ظاہر نہیں کی گئی) کی جانب سے درج کرائی جانے والی ایف آئی آر کے مطابق ان کی سلمان سے پہلی ملاقات ممبئی کے علاقے اوشیوارا اندھیری میں ایک کافی شاپ میں ہوئی تھی جہاں سلمان نے انہیں دبئی کے ’’بالی ووڈ پارک‘‘میں ان کے ساتھ پرفارم کرنے کی پیشکش کی تھی،بعد ازاں سلمان نے انہیں گھر چھوڑنے کی پیشکش کی اور اسی دوران انہیں نامناسب انداز میں چھوا۔دوسرا واقعہ ایئرپورٹ پر پیش آیا جب سلمان نے انہیں اپنے کزن سے متعارف کروایا اس وقت سلمان اور ان کے کزن نے انہیں ایئرپورٹ سے واپسی پر کار میں دوبارہ نامناسب طریقے سے چھوا۔ متاثرہ خاتون کا مزید کہنا تھا کہ اس واقعے کے چند روز بعد سلمان اور اس کی ٹیم نے انہیں ہراساں کیا اور سنگین نتائج کی دھمکیاں بھی دیں۔ بعد ازاں سلمان نے زبردستی ان کے ساتھ معاہدہ ختم کرکے انہیں ممبئی روانہ کردیا۔ایشورا پولیس سٹیشن ممبئی نے خاتون ڈانسر کی درخواست پر سلمان یوسف خان کے خلاف مقدمہ درج کر کے تحقیقات کا آغاز کر دیا ہے ۔