ممبئی(سچ نیوز) شادی کے متعلق درجنوں کیا سینکڑوں لطیفے مشہور ہیں اور لوگ ان میں نت نیا اضافہ کرتے رہتے ہیں اور لوگ ان سے لطف اندوز بھی ہوتے ہیں لیکن بالی ووڈ اداکارہ سشمیتا سین کو شادی کے بارے میں لطیفہ سنانا مہنگا پڑ گیا ہے۔ ٹائمز آف انڈیا کے مطابق سشمیتا سین، جو تمام عمر شادی سے دور بھاگنے کے بعد بالآخر خود سے کئی سال چھوٹے ماڈل روہمن شاول کی محبت میں گرفتار ہیں اور دونوں جلد شادی کرنے والے ہیں۔ اسی حوالے سے گزشتہ دنوں سشمیتا سین نے اپنے انسٹاگرام پر شادی کے متعلق ایک لطیفہ سنایا جس کا مقصد شادی روہمن سے اپنی محبت کا اظہار کرنا تھا۔سشمیتاسین نے ایک پوسٹ میں لکھا کہ ”جس شخص نے بھی شادی ایجاد کی وہ کوئی بہت نامعقول انسان تھا۔ میں ’تم‘ سے محبت کرتی ہوں اور اس معاملے میں حکومت کو بھی ملوث کرنے جا رہی ہوں تاکہ تم مجھے چھوڑ کر نہ جا سکو۔“سشمیتا سین نے تو ازراہِ مذاق یہ بات کہی لیکن انٹرنیٹ صارفین نے اسے سنجیدہ لے لیا اور اداکارہ کو کھری کھری سنانی شروع کر دیں۔ دیپالی داس نامی لڑکی نے کمنٹس میں لکھا کہ ”شادی ذاتی پسند و ناپسند کا معاملہ ہے۔ آپ کو پسند ہے تو شادی کر لیں، نہیں پسند تو نہ کریں لیکن اپنی رائے کو دوسروں پر مسلط نہ کریں۔“شیوانی سنگھ نامی خاتون نے کہا کہ ”یہ لطیفہ ہے؟ یہ پوسٹ پڑھ کر بہت تکلیف ہوئی۔ بہرحال بعض اوقات ہم غیرارادی طور پر ایسی بات کہہ جاتے ہیں جو دوسروں کے لیے تکلیف کا باعث بنتی ہے۔آپ سے بھی ایسا ہی سرزد ہوا۔“روی دیول نے لکھا کہ ”انتہائی مضحکہ خیز، اس طرح کے حسِ مزاح کی کوئی بھی تعریف نہیں کر سکتا۔“ دوسری طرف بعض لوگ سشمیتا کے دفاع میں بھی آگے آئے۔ انہی میں سے ایک شخص نے لکھا کہ ”سشمیتا سین نے ازراہ تفنن ایک فقرہ کہا ہے۔ اسے اس حد تک آگے لیجانے اور ایک ایشو بنانے کی قطعاً ضرورت نہیں۔“
