لاہور(اکرام الدین) پنجاب آرٹس ایند کرافٹس میوزیم نے لاہور آرٹس کونسل کے ساتھ مل کر اللہ بخش آر ٹ گیلریز الحمرا مال روڈ پرایک نمائش کا اہتمام کیا ہے۔اس دوروزہ تقریب میں ہال ہی میں پنجاب یونی ورسٹی سے فارغ التحصیل آرٹسٹوں شمسہ اور حوریہ کے فن پاروں کے ساتھ ساتھ پنجاب کی دستکاری کے مختلف نمونے بھی فنون لطیفہ سے شغف رکھنے والوں کی توجہ کا مرکز بنے ہوے ہیں۔نمائش کا افتتاح سینیر آرسٹ اور آرٹ لور طلحہ علی کوشاوا اور ایم پی اے شاہین رضا نے کیا۔اس موقع پر طلحہ علی کوشاوا نے کہا کہ نوجوان آرٹسٹوں نے بہت محنت کی ہے اپنے فن پاروں پر اور ان کے کام سے گہری سوچ جھلکتی ہے۔سائے بھی نشان رکھتے کے عنوان سے جاری اس نمائش میں شمسہ نے ہوسٹل لائف کو موضوع بنا یا ہے ۔ سٹل لائف کے ذریعے انہوں نے اس تجربہ کو اپنے فن پاروں کی زینت بنایا ہے ۔یوں لگتا ہے آرٹسٹ نے اپنے دوران تعلیم کو اپنے فن میں سمودیا ہے۔کیسے کچھ عرصے کے لیے طالب علم ان مکانوں کے مکین بنتے ہیں اور پھر ہمیشہ کے لیے اںہیں چھوڑ جاتے ہیں۔اسی طرح حوریہ نے سائے بھی نشان رکھتے ہیں کو کینوس پر اتارا ہے ۔ اس کے علاوہ انہوں نے لاہور کے ورثہ میں سے دریچوں ، جھروکوں اور دروازوں کو پینٹ کیا ہے ۔کچھ دریچے تو گویاں اپنی آخری سانسیں لے رہے ہیں ۔ نمائش کے کیوریٹر میاں عتقیق احمد نے اس موقع پر کہا کہ ان فن پاروں کا ہماری دستکاریوں کے ساتھ گہرا تعلق ہے۔ان کے ذریعے سے ہم ان گمنام آرٹسٹوں کی محنت کو سراحتے ہیں جنہوں نے دھاتوں ،لکڑی اور کپڑے پر یہ فن پارے تخلیق کیے ہیں۔انہوں نے امید ظاہر کی کہ اس طرح نئی نسل کے ساتھ پرانے ہنرمندوں کا تعلق قائم ہوا ہے.
