سیاسی جماعتیں اداروں کوگالیاں دینے والوں کیخلاف متحد ہوجائیں :فیصل واڈا

اسلام آباد (سچ نیوز) وفاقی وزیر برائے آبی وسائل فیصل واڈا نے کہاہے کہ عوام کوگمراہ کرنے والے سے سختی سے نہ نمٹا تو شدت پسندی پورے ملک کوکھائی جائیگی ، اداروں کو گالیاں دینے والوں کے خلاف تمام سیاسی جماعتوں کومل کر بیٹھنا ہوگا ۔جیونیوز کے پروگرام ”آپس کی بات “ میں گفتگو کرتے ہوئے فیصل واڈا نے کہا کہ کوئی مذہب دہشت گردی نہیں پھیلاتا ، یہ جہالت ہے ، اٹھارہ سال کے بچوں کواسلام کے نام پر گمراہ کیاجارہاہے ، انہوں نے کہا کہ یہ گروہ ریاست کوبلیک میل نہیں کرسکتے ۔ انہوں نے کہا کہ جنہوں نے عوام کوگمراہ کیاہے ان کے ساتھ سختی سے نمٹنا پڑے گا ورنہ یہ شدت پسندی پورے ملک کوکھاجائے گی ۔ انہوں نے کہا کہ اداروں کوکھلے عام گالیاں دینے والوں کیخلاف تمام سیاسی جماعتوں کو متحد ہوکر بیٹھنا ہوگا ، یہ جو کچھ میڈیا ، عام پاکستانیوں کے ساتھ کیا جارہاہے اس کے خلاف مل بیٹھ کر کچھ کرناہوگا ورنہ یہ ملک تباہی کی طرف چلا جائے گا ، انہوں نے کہا کہ ہم کسی کے خلاف نہیں ہیں لیکن مذہب کا غلط استعمال کسی صورت بھی قابل قبول نہیں ہے ۔