اسلام آباد: (سچ نیوز) صدرمملکت عارف علوی سے ملاقات کیلئے سعودی ولی عہد محمد بن سلمان ایوان صدر پہنچ گئے جہاں صدر مملکت سے ملاقات کے بعد معزز مہمان کو پاکستان کے اعلی ترین سول ایوارڈ سے نوازا جائے گا۔
پاکستان کے دورے پر آئے سعودی ولی عہد آج وزیراعظم کے ہمراہ ایوان صدر پہنچے، شاہی مہمان کو بھرپور پروٹوکول کے ساتھ خصوصی بگھی میں سوار کر کے منزل پر پہنچایا گیا۔ اس دوران سعودی ولی عہد اور وزیراعظم خوشگوار موڈ میں دکھائی دیئے۔ ایوان صدر پہنچنے پر صدر مملکت نے شہزادہ محمد بن سلمان کو خوش آمدید کہا اور گرم جوشی سے ہاتھ ملایا۔ اس موقع پر وزیر خارجہ شاہ محمود قریشی، وزیر اطلاعات فواد چودھری سمیت کابینہ اراکین بھی موجود تھے۔
صدر عارف علوی کے ساتھ ملاقات میں پاک سعودی عرب تعلقات سمیت باہمی دلچسپی کے امور پر گفتگو ہو گی جس کے بعد سعودی ولی عہد کو پروقار تقریب میں نشان پاکستان سے نوازا جائے گا۔ شہزادہ محمد بن سلمان کے اعزاز میں ظہرانے کا اہتمام بھی کیا گیا ہے۔
