نئی دہلی (سچ نیوز) بھارت کے سرکاری ادارے نے بین الاقوامی شہرت یافتہ پاکستانی گلوکار راحت فتح علی خان پر کرنسی سمگلنگ کا الزام عائد کیا ہے اور شوکاز نوٹس جاری کرتے ہوئے 45 روز میں جواب طلب کر لیا ہے۔بھارتی میڈیا رپورٹس کے مطابق بھارت نے راحت فتح علی خان پر الزام عائد کیا ہے کہ انہوں نے بھارت سے بھاری رقم غیر قانونی طریقے سے سمگل کی جس پر بھارت کے انفورسمنٹ ڈائریکٹوریٹ نے فورن ایکسچینج مینجمنٹ ایکٹ کی خلاف ورزی پر راحت فتح علی خان کو شوکاز نوٹس جاری کرتے ہوئے 45 روز میں جواب طلب کیا ہے۔ شوکاز نوٹس میں دعویٰ کیا گیا ہے کہ پاکستانی گلوکار نے 2 کروڑ روپے کی رقم غیر قانونی طریقے سے بیرون ملک منتقل کی۔واضح رہے کہ بین الاقوامی شہرت یافتہ گلوکار کو 2011ءمیں نئی دہلی کے اندرا گاندھی انٹرنیشنل ایئرپورٹ پر 1 کروڑ 24 لاکھ روپے کی بھاری رقم کے ساتھ گرفتار کیا گیا تھا۔بھارتی پولیس نے راحت فتح علی خان سے پیسوں کی دستاویزات بھی طلب کی تھیں جسے وہ دکھا نہیں سکے تھے، بعد ازاں پولیس نے ان کے منیجر کو بھی گرفتار کرلیا تھا۔
