نئی دہلی(سچ نیوز)علی گڑھ مسلم یونی ورسٹی میں زیر تعلیم کشمیری طلباء نے دھمکی دی ہے کہ 3طلباء پر لگائے گئے بغاوت کے الزامات واپس نہ لئے گئے تو تمام طلبا یونیورسٹی کو خیر آباد کہہ دیں گے۔بھارتی خبر رساں ادارے کے مطابق علی گڑھ مسلم یونیورسٹی (اے ایم یو)میں پڑھنے والے کشمیری طلبہ نے دھمکی دی ہے کہ اگر 3 طلبہ پر لگائے گئے بغاوت کے الزام کو واپس نہیں لیا جاتا تو وہ 17 اکتوبر پر اپنے گھروں کو واپس لوٹ جائیں گے۔ اے ایم یو وائس چانسلر کے نام لکھے گئے خطر میں علی گڑھ مسلم یونیورسٹی کی طلبہ یونین کے سابق نائب صدر سجاد راتھڑ کا کہنا تھا کہ اگر تذلیل نہیں روکی گئی تو 1200 سے زائد کشمیری طلبہ آخری آپشن کے طور پر 17 اکتوبر کو اپنے گھر واپس چلے جائیں گے۔خیال رہے کہ 3 کشمیر طلبہ پر الزام ہے کہ انہوں نے اے ایم یو کے سابق پی ایچ ڈی سکالر ڈاکٹر منان وانی کے قتل کے خلاف احتجاج میں بھارت مخالف نعرے لگائے تھے۔رپورٹ کے مطابق سجاد راتھڑ نے بغاوت کے الزامات کو انتقام قرار دیتے ہوئے کہا کہ علی گڑھ مسلم یونیورسٹی کی انتظامیہ کی جانب سے اجازت نہ دینے کے باعث وہ لوگ غائبانہ نماز جنازہ کا انعقاد نہیں کرسکے۔انہوں نے کہا کہ اگر نماز جنازہ کی اجازت نہیں دی گئی تو یہ تمام سرکاری ایجنسیوں کی طرف سے اس بات کی تصدیق ہے کہ 3 کشمیری طلبہ کے خلاف بغاوت کا مقدمہ انتقام لینا، حراساں کرنا اور انصاف سے انکار کرنا ہے۔اخبار کے مطابق طلبہ یونین کے سابق نائب صدر کی جانب سے یہ خط بڑی تعداد میں کشمیری طلبہ کی موجودگی میں اے ایم یو کے پروکٹر محسن خان کے حوالے کیا گیا۔دوسری جانب علی گڑھ مسلم یونیورسٹی کے ترجمان شافع کدوائی نے کشمیری طلبہ کے حراساں کرنے کے الزامات کو مسترد کرتے ہوئے زور دیا کہ کوئی بے گناہ متاثر نہیں ہوگا۔انہوں نے کہا کہ طلبہ پر الزام ہے کہ وہ مبینہ طور پر بھارت مخالف نعرے لگا رہے تھے اور منان وانی کا نماز جنازہ ادا کرنے کی کوشش کر رہے تھے۔
