نئی دلی(سچ نیوز) گزشتہ چند سالوں سے پاکستان کو بھی سموگ یعنی آلودہ دھند کی شکل میں اُس مصیبت کا سامنا کرنا پڑا رہا ہے جس کا پہلے کبھی ہم نے نام بھی نہیں سنا تھا۔ ہمارے ہاں یہ ماحولیاتی مسئلہ پیدا ہونے میں ایک بڑا حصہ ہمسایہ ملک بھارت کا بھی ہے، جہاں سے یہ آلودگی ہماری جانب منتقل ہوتی ہے۔ بھارت میں اس مسئلے کی شدت کا یہ عالم ہے کہ ابھی موسم سرما کا آغاز ہوا نہیں اور دارالحکومت نئی دلی سموگ کی زد میں آ بھی چکا ہے۔ اور بھارت کے لئے شرمندگی کی بات یہ ہے کہ ایک مشہور غیر ملکی گلوکار نے بھارتی درالحکومت میں آلودگی کی افسوسناک تصویر ساری دنیا کو دکھا دی ہے۔برائن ایڈمز بھارت میں میوزک کنسرٹ کے لئے آئے تھے اور اُن کا تازہ ترین کنسرٹ نئی دلی میں تھا۔ اس کنسرٹ کے بعد انہوں نے سوشل میڈیا پر ایک ایسی تصویر شئیر کی جس نے بھارت کو دنیا بھر میں شرمندہ کر دیا ہے۔ یہ تصویر اُس وقت بنائی گئی جب وہ سٹیج پر گلوکاری کر رہے تھے اور اُن کے پیچھے لگی طاقتور روشنیوں کی وجہ سے اُن کا سایہ آسمان پر چھائی سموگ کے اوپر بن رہا تھا۔ برائن خود بھی حیران تھے کہ آلودہ دھند اتنی گہری تھی کہ اس کے اوپر اُن کا سایہ بن رہا تھا، اور یہ ایک بہت بڑے بھوت جیسا ہیولا نظر آ رہا تھا۔سوشل میڈیا پر انہوں نے لکھا ’’ اس تصویر میں اگر آپ غور سے دیکھیں تو آپ کو گردو غبار اور دھند کے اوپر میرا سایہ نظر آسکتا ہے۔ میں نے پہلے یہ منظر کبھی نہیں دیکھا ۔‘‘برائن کا مزید کہنا تھا کہ وہ سال 2018 کے موسم سرما کو کبھی نہیں بھولیں گے، جس کی وجہ نئی دلی کی آلودگی ہے
