نئی دہلی(سچ نیوز)بھارتی دارالحکومت میں ایک شخص نے 25سالہ خاتون وکیل کے ساتھ زیادتی کی کوشش کی،خاتون وکیل کی نشاندھی پر ملزم کو گرفتار کر لیا گیا ہے۔بھارتی خبر رساں ادارے کے مطابق بھارت کے دارالحکومت نئی دہلی کے علاقے امار کالونی میں ایک شخص نے 25 سالہ وکیل کا ریپ کرنے کی کوشش کی۔خاتون وکیل پارک میں چہل قدمی کے لیے گئی تھیں جہاں ان کے ساتھ یہ واقعہ پیش آیا۔انہوں نے الزام لگایا کہ وہ امر کالونی میں قائم کیلاش ہلز پارک میں چہل قدمی کرنے گئی تھیں جہاں انہیں ایک نامعلوم شخص نے پیچھے سے دبوچ کر ریپ کرنے کی کوشش کی۔خاتون وکیل کا کہنا تھا کہ انہوں نے ملزم کو پکڑ کر اسے مارنے کی کوشش کی لیکن ملزم ان پر حملہ کرتے ہوئے دیوار پھلانگ کر بھاگ گیا۔متاثرہ خاتون نے اپنے فیس بک پر واقعے کے حوالے سے لکھتے ہوئے دہلی کی پولیس پر بھی سنگین نوعیت کے الزامات لگائے۔انہوں نے دعوی کیا کہ واقعے کی فرسٹ انفارمیشن رپورٹ(ایف آئی آر)کئی گھنٹوں تک درج نہیں کی گئی تھی۔ان کا کہنا تھا کہ واقعے کا مقدمہ اس وقت درج ہوا جب انہوں نے اسٹیشن ہاؤس آفیسر(ایس ایچ او)سے بات کی اور اسے اپنے بارے میں بتایا۔دہلی پولیس کی جانب سے بھارتی پینل کوڈ کی دفعہ 376 کے تحت مقدمہ درج کیا۔خاتون نے سماجی رابطے کی ویب سائٹ پر لکھا کہ یہ انتہائی شرمناک ہے کہ دہلی کی پولیس اس طرح کے سنگین معاملات پر اتنی لاپرواہی برتتی ہے۔بعد ازاں متاثرہ خاتون نے پولیس کے ہمراہ جائے وقوع کا دورہ کیا جہاں انہیں ملزم دوبارہ نظر آیا۔خاتون کی نشاندہی پر پولیس نے فوری کارروائی کرتے ہوئے مبینہ ملزم کو گرفتار کرلیا۔
