اقوام متحدہ کی آن لائن دستاویزی فلم کی نمائش کی، ورچوئل تقریب سے خطاب بہتر دنیا کیلئے سب کوبا وقار مواقع دینے کی ضرورت گوتریس
نیویارک(سچ نیوز)اقوام متحدہ کی خصوصی سفیر برائے امن اور نوبیل انعام یافتہ پاکستانی سماجی کارکن ملالہ یوسفزئی نے کہاہے کہ دنیا سے کورونا کی وبا کے خاتمے کے باوجود 2 کروڑ لڑکیوں کے سکول واپس نہ آنے کا خدشہ پیدا ہوگیا، ملالہ یوسفزئی نے اقوام متحدہ کی جانب سے آن لائن دستاویزی فلم کی نمائش کی ورچوئل تقریب کے موقع پر اپنے خطاب میں کورونا کی وجہ سے دنیا بھر میں لڑکیوں کی متاثر ہونے والی تعلیم اور خواتین کے مسائل بڑھنے پر بات کی۔ اپنے مختصر خطاب میں ملالہ نے کہا کہ دنیا بھر میں تعلیمی منصوبوں کو جاری رکھنے کے لیے اب سالانہ 200 ارب ڈالر کی ضرورت پڑے گی۔ ملالہ نے اقوام متحدہ سے بھی سخت سوالات کیے اور کہا کہ کب عالمی ادارہ دنیا بھر میں 12 سال کی عمر کے بچوں کی مفت تعلیم ، امن کو ترجیح اور مہاجرین کی حفاظت کے لیے سخت اقدامات اٹھائے گا؟ تقریب سے سیکرٹری جنرل انتونیو گوتریس نے کہا کہ دنیاکوبہتربنانے کیلئے ہرکسی کو وقار کیساتھ مواقع فراہم کرنے کی ضرورت ہے ، امیر ممالک ترقی پذیر ممالک کی فوری، درمیانی اور طویل المدتی ضروریات کو پورا کرنے میں کردار ادا کریں اور غریب ممالک کے قرضوں کو کم از کم 2021 تک معاف کئے جانے کی مہم کی حمایت کریں،یو این ڈی پی کے سربراہ نے کہا کہ گزشتہ 30 سال سے جاری انسانی ترقی کے پائیدار منصوبوں کا حالیہ صورتحال کی وجہ سے متاثر ہونے کا خدشہ ہے ۔
