اسلام آباد(سچ نیوز)وزیرمملکت برائے سیفران شہریار آفریدی نے کہا ہے کہ اقتدار کا مزہ بہت خطرناک ہے،اداروں اور فوج میں کوئی کرپٹ ہے تو اس کا یہ مطلب نہیں کہ اداروں کو گالی دیں۔اسلام آباد میں سوشل میڈیا کانفرنس سے خطاب کرتے ہوئے شہریار آفریدی نےکہا کہ آج کل بچوں کو بڑے سکولوں میں پڑھایا جاتا ہے تاکہ بچہ حکمرانی کرے، اقتدارکا مزہ بہت خطرناک ہے،عہدے ملنے سے شیطان حاوی ہونے کی کوشش کرتا ہے،دین اسلام امن اور محبت کا مذہب ہے۔شہریار آفریدی نے کہا کہ مسجدوں اور خانقاہوں میں دھماکے کروائے گئے، پاکستانیوں کی بیٹیوں کو کلچر ایکسچینج پروگرام کے تحت بیرون ملک بلایا گیا، ویڈیوز بنائی گئیں اور ان کو بلیک میل کیا گیا۔وزیر سیفران نے کہا کہ اداروں اور فوج میں کوئی کرپٹ ہے تو اس کا یہ مطلب نہیں کہ اداروں کو گالی دیں، مجھے فوج، وزیراعظم یا کسی اور نے عزت نہیں دی، مجھے اللہ نے عزت دی ہے۔